Arman Barakov

Arman Barakov (tolıq atı: Barakov Arman Sabırbayevich) — 1988-jılı 9-avgustta Kegeyli rayonı Xalqabad qalasında tuwılǵan. Teatr hám kino aktyorı.

Arman Barakov
Arman Barakov
Tuwılǵan sánesi	9-avgust 1988-jılı(1988-08-09) (36 jasta)
Tuwılǵan jeri	Xalqabad, Kegeyli rayonı, QQASSR, ÓZASSR, SSRA
Puqaralıǵı	Ózbekstan
Milleti	qazaq
Kásibi	teatr aktyorı, kino aktyorı, baslawshı, telejurnalist
Oqıǵan jeri	Ózbekstan Mámleketlik kórkem óner hám mádeniyat institutı Nókis filialı (2020-2024)
Iskerlik jılları	2017 – házirgi kúnde
Filmleri	«Atalar sózi» «Ómir sınaqları» «Shúkirligim kóp meniń» (2017) «Pushayman» (2018) «Seyf» (2019) «Ayjamal» (2020) «Aydınlar» (2020) «Joytılǵan táspi» (2020) «Úlken úy» (2020) «Qaytar dúnya» (2020) «Órnekli ómir» (2020) «Dilozor-2» (2023) «Rekeetir» (2024) «Ájiniyaz» (2024))
Ákesi	Sabırbay Barakov
Anası	Bibizáwre Masharipova
Ómirlik joldası	Mexriban Jamalova
Perzentleri	Serik Barakov Janerke Sabırbaeva Nazerke Sabırbaeva

Ómirbayanı

1995-jılı Kegeyli rayonına qaraslı 19-sanlı ulıwma orta bilim beriw mektebine 1-klassqa oqıwǵa barıp, 2004-jılı mektepti tamamlaydı.

2002-2007-jıllarda Kegeyli rayonı Balalar muzıka hám kórkem-óner mektebinde bayan, akkardion bóliminde oqıdı.

2004-2007-jıllarda Xalqabad Sanaat-transport kásip-óner kolledji «Menedjer» bólimine oqıdı.

2008-jılı Ózbekstan mámleketlik kórkem-óner hám mádeniyat instituti Nókis filialına hújjet tapsırıp «Drama teatrı hám kino aktyorlıǵı» bólimine tólemli shártnama tiykarında oqıwǵa qabıl etiledi biraq shártnama pulların tólewde qıyınshılıq bolıwına baylanıslı oqıwın dawam ete almaydı. Onnan soń 2014-jılı Ájiniyaz atındaǵı Nókis mámleketlik pedagogika institutınıń rus tili hám ádebiyatı fakultetiniń evrotilli toparına tólemli shártnama tiykarında oqıwǵa qabıl etiledi, biraq bul ret te oqıwın dawam ete almaydı. Ardan jıllar ótip, 2019-jılı Ózbekstan mámleketlik kórkem-óner hám mádeniyat institutı Nókis filialına hújjetlerin tapsırıp muzikalı teatr aktyorlıǵı bólimine tólemli shártnama tiykarında oqıwǵa túsedi, biraq bul jolı da oqıy almaydı. Arman oqıyman degen niyetinen qaytpadı hám 2020-jılı Ózbekstan mámleketlik kórkem-óner hám mádeniyat institutı Nókis filialı «Qosıq teatr rejissiyorlıǵı» fakultetine oqıwǵa túsip, usı oqıw dárgayın 2024-jılı tabıslı tamamlap shıqtı.

Dóretiwshiligi

Aktyor birneshe filmlerde rol atqarǵan. Dóretiwshilik jolın 2017-jılı Ómirbek Bekturǵanovtıń «Shúkirligim kóp meniń» atlı qısqa metrajlı filminde oynawdan baslaǵan.

«Qaraqalpaqstan» telekanalı tárepinen súwretke alınǵan «Atalar sózi», «Ómir sınaqları» video filmlerinde, 2017-jılı «Shúkirligim kóp meniń», 2018-jılı Aybek Tóreevtiń «Pushayman», 2019-jılı Aybek Tóreevtiń «Seyf» filmlerinde, 2020-jılı «Joytılǵan táspi», «Úlken úy», «Qaytar dúnya», «Órnekli ómir» telenovellalarında, «Ayjamal» teleserialında, 2020-2021-jılları «Tezlik», «Ózgeshe tanısıw», «Tilge húrmet» hám «Korrupciya» sıyaqlı sociallıq roliklerde zamanımız qaharmanlarınıń obrazların jaratıwda belsendilik penen qatıp kelmekte.

Ol 2019-jılı Qazaqstan Respublikası Almatı qalasında bolıp ótken «Almaty Film Festival» kinofestivalında qatnasadı.

2020-jılı «Ózbektelefilm» tárepinen Muzaffar Erkinov hám Muzaffar Karabaevlar rejissyorlıǵında súwretke alınǵan «Aydınlar» filminde bas qaharman Seyit obrazın atqardı. Bul film aktyordıń xalıqqa ele de tanılıwına jol ashtı.

2021-jılı kino rejissyor Hilol Nasimovtıń «Vatan Ostonasi» teleserialında áskeriy xızmetker obrazın jaratadı. «Keri tilek» telenovellasında, «Ilmek» telejurnalında roller dóretti.

2023-jılı Tashkent qalasında «Oʻzbektelefilm» tárepinen rejissyor Muzaffar Qarabaevtiń basshılıǵında súwretke alınǵan «Dilozor-2» teleserialında Jabbor obrazın jaratadı. Teleserial «Kinoteatr» telekanalı arqalı efirge berildi.

2024-jılı Qazaqstan Respublikası Almatı qalasında kino rejissyor Akan Sataevtiń ataqlı «Rekeetir» filminiń úshinshi bóliminde epizod rol atqaradı.

2024-jılı «Qaraqalpaqfilm» tárepinen súwretke alınǵan «Ájiniyaz» kórkem-publicistikalıq filminde bas qaharman Ájiniyaz shayırdıń jaslıq dáwirin sáwlelendiredi.

Arman Barakov birneshe jıl «Qaraqalpaqstan» teleradiokompaniyasında «Assalawma áleykum, Qaraqalpaqstan!» tańǵı saz-sáwbet kórsetiwi, «Múnásibet» sociallıq-siyasıy, «Hákim járdemshisiniń 1 kúni» telekórsetiwlerinde telebaslawshı bolıp jumıs isledi.

Shańaraǵı

Arman Barakov shańaraqta tunǵısh perzent. Ákesi — Barakov Sabırbay Qonaqbaevich, anası — Masharipova Bibizáwre Qoshqarbaevna, inisi — Barakov Xajımuxan.

Aktyor ómirlik joldası Jamalova Mexriban menen 2011-jılı shańaraq tiklegen. Házirgi waqıtta bir ul hám eki qız perzenttiń ákesi. Perzentleri Barakov Serik, Sabırbaeva Janerke hám Sabırbaeva Nazerke.

Arman Barakov Instagram, YouTube, Telegram, Facebook social tarmaqlarındaǵı betlerin belsendi túrde júrgizedi.