Qaraqalpaqstan telekanalı

Qaraqalpaqstan — Ózbekstan milliy teleradiokompaniyası quramına kiriwshi jergilikli telekanal. Qaraqalpaqstan Respublikası aymaǵında efir júrgizedi. Sutkada 18 saat iskerlik alıp baradı, efir tiykarınan qaraqalpaq tilinde, qosımsha ózbek, qazaq hám rus tillerinde de kórsetiwler berip baradı. Qaraqalpaq tilinde efirge uzatıwshı eń eski hám eń úlken telekanal sanaladı. Telekanaldıń bas imaratı Nókis qalasında jaylasqan.

Tariyxı

Qaraqalpaq televideniyesiniń dáslepki baǵdarlamaları 1964-jıl 5-noyabr 19:00de Nókis, Taqıyatas, Xojeli qalalarında qaraqalpaq hám rus tillerinde kúnine birneshe minuttan efirge uzatılıwın baslaǵan. Usı kúni qaraqalpaq hám orıs tillerinde «Jańalıqlar» kórsetilgen. Birinshi diktorlar – Orazgúl Óteniyazova menen Svetlana Shapochnikovalar fotosyujetler fonında miynet jámáátleriniń raportları tuwralı aytqan.

Birinshi telejańalıqlardı qaraqalpaq tilinde Ǵalım Seytnazarov hám Qarmıs Dosanov, al orıs tilinde Viktor Kopalovlar tayarlaǵan.

1965-jıldan bul televideniye háptesine tórt márte 2,5 saattan efirge uzatıw imkániyatına iye bolǵan. Keyingi jıllarda efir saatları hám kúnleri uzaya baslaǵan. Ózbekstan ǵárezsizligi daǵaza etilgeninen soń Qaraqalpaqstan televideniyesi Ózbekstan DTRK (házirgi Ózbekiston MTRK) quramına kirgen. 2002-jıl Qaraqalpaqstan Respublikası Teleradiokompaniyası shólkemlestirilgen.

Jónelisi

Telekanal jónelisi universal. Telekanal efirinde jámiyet, siyasat, ilim-pán, tárbiyalıq hám rawajlantırıwshı kórsetiwler hám baǵdarlamalar, milliy hám shet el filmleri, seriallar hám multfilmler, jańalıqlar uzatıladı.

Qosımsha qarań

• Qaraqalpaqstan tеlеvideniesi

Siltemeler

• Qaraqalpaqstan MTRK