Nadirbek Abdusattarov

Nadirbek Abdusattarov (18-sentyabr 2004-jılda tuwılǵan) — ózbekstanlı shaxmatshı, xalıqaralıq kólemdegi grossmeyster. Tez jónelistegi shaxmat boyısha jáhán chempionı. Shaxmat tariyxında besinshi eń jas grossmeyster Hindstannıń Chennay qalasında ótkerilgen 44-shaxmat Olimpiadası jeńimpazı. Ózbekstan maqtanıshı medalı iyesi.

Ómirbayanı

Bolajaq grossmeyster 2004-jıl 18-sentyabr kúni Tashkent qalasında tuwılǵan. Balalıǵı Tashkent qalasında ótken. Ájaǵası hám ajapasınıń shaxmat oynawına qızıǵıp ǵárezsiz túrde shaxmattı úyrene baslaǵan. 8 jasınan baslap jarıslarda qatnasıp keledi. 2021-jılda shaxmattıń rapid baǵdarı boyınsha chempionǵa aylanıp, bul nátiyjeni alǵan eń jas shaxmatshıǵa aylandı. 2022-jılda ótkerilgen 44-shaxmat Olimpiadasında Ózbekstan húrmetin qorǵap  toparı menen birgelikte Ózbekstanǵa dáslepki Olimpiada chempionlıǵın alıp keldi. Shaxmatta erisken jetiskenlikleri inabatqa alınıp, Jas shaxmatshıǵa Ózbekstan maqtanıshı medalı tapsırıldı.

Iskerligi

2012-jılda Sloveniyanıń Maribor qalasında 8 jasqa deyingi óspirimler ortasında shaxmat boyınsha Jáhán kubogın qolǵa kirgizdi. 2014-jılda 9 jaslı Nadirbek Tashkentte Georgiy Azamov húrmetine arnalǵan shaxmat turnirinde eki grossmeysterdi jeńiwge eristi. 2015-jıl noyabr ayında Gretsiyanıń Porto-Karas qalasında bolıp ótken shaxmat boyınsha óspirimler ortasındaǵı jáhán chempionatında tórtinshi orındı iyeledi. 2017-jıldıń 29 -oktyabrinde Chigorin memorialı jarısında úshinshi orındı iyeledi. Bul turnir dawamında 13 jaslı Nadirbek óz reytingin 2500 balldan joqarı kóterip, grossmeyster ataǵına iye boldı. 2021-jıl sentyabr ayında Abdusattarov Rossiya shaxmat federatsiyası tárepinen " Yasnaya Polyana" muzey-múlkinde islengen Lev Tolstoy atındaǵı turnirinde ekinshi orındı iyeledi. 2021-jıl 26 -29 -dekabr kúnleri Polshanıń Varshava qalasında bolıp ótken operativ shaxmat boyınsha jáhán chempionatında ámeldegi jáhán chempionları — Yan Nepomnyashchiy hám Magnus Carlsendi jeńiliske ushıratdı. 2023-jılda Chigorin ramziy klubına aǵza bolıp, klassik oyında Magnus Carlsendi artta qaldırdı.2022-jılda ótkerilgen 44-pútkil dúnya olimpiadasınıń 10 -túrinde Ózbekstan toparı Hindstanda 2 toparına qarsı gúres alıp bardı. Júdá awır keshken oyında hindlerdiń qolı biyik keliwine heshkim gúmanlanıp atırǵan joq edi. Nadirbek Yokubbaev hám Jáhángir Vahidov qarsılasları menen teńbe-teń oynaǵan, Javohir Sindarov bolsa jeńiliske ushıraǵan edi. Aqırǵı oyında 2021-jılǵı Rapid boyınsha Jáhán chempionı Nadirbek Abdusattarov Hindstanlı kúshli shaxmatshı Gukesh menen tartıs alıp bardı. Bes saattan artıq dawam etken oyın dúnyadaǵı shaxmat adamların ózine qarattı. Oyınnıń derlik tolıq bóleginde Gukesh ústinlik etdi. Nadirbek Abdusattarov aqırına shekem gúresip juwmaqta Gukeshti jeńiliske ushırattı Topar ushın zárúr ochkonı keltirdi.

Siltemeler

Nodirbek Abdusattorovning FIDE saytidagi sahifasi