Júweri gúrtik

Júweri gúrtik (qaraqalpaq tilinde: Júweri gúrtik, jueri gúrtik yaki júgeri gúrtik) – qaraqalpaq asxanasınıń júweri unınan tayarlanatuǵın milliy taǵamı. Ol Qaraqalpaq asxanasında keń tayarlanatuǵın tamaqlar qatarına kiredi. Taǵamdı ádette besbarmaq penen adastırıp jiberedi.

Tayarlaw procesi

Júweri gúrtikti tayarlawda tiykarlanınan un hám arnawlı jarmadan paydalanıladı. Un Qaraqalpaqstan aymaǵında turaqlı ósimlik bolǵan júweri dáninen tayarlanadı. Tamaq ushın maydalanıp domalaq formaǵa keltirilgen piyaz, kartoshka hám geshir qosılǵan gósh aralaspası kerek boladı. Bul tamaq bir qarawda pilmenge uqsap ketedi. Júweri gúrtik tiykarlanınan qozı yamasa túyetawıq góshi aralapasınan tayar bolǵan ónimlerdi júweri unınan tayarlanǵan teńge formasındaǵı qamırǵa búgiw arqalı pisiriledi.

„Júweri gúrtik“ kúni

2023-jıldıń 25-fevral kúni túrli social tarmaqlar arqalı jámiyetshilik tárepinen „Júweri gúrtik“ kúnin Qaraqalpaqstan Respublikasında keń bayramlaw ǵayratı jergilikli xalıq tárepinen qollap -quwatlanǵan. Sonnan keyin Xojeli rayon hákimligi, sonıń menen birge, Turizm hám mádeniy miyraslar ministrligi, Qaraqalpaqstan Respublikası Aspazlar awqamı, Nókis qalası 1-sanlı qánigelestirilgen mádeniyat mektep jámááti járdeminde dáslepki márte „Júweri gúrtik“ kúni bayramlanǵan. Júweri gúrtiktiń eń úlken porsiyası Nókis qalasında jaylasqan prezident mektepte tayarlanǵan. Prezident mekteptegi taǵamdı tayarlaw procesinde 20 túyetawıq góshi, 35 kg júweri onı hám 15 kg biyday unı sarıplanǵan. Tayarlanǵan tamaq diametri 3, 5 x2, 5 metr ólshemde tayarlap alınǵan „tabaq“qa súzilgen.. „Júweri gúrtik“ kúnin Rossiya, Qazaqstan, Qırǵızstan, Qubla Koreya hám basqa mámleketlerde jasawshı qaraqalpaq belsendileri de birge bayramlaǵan..