Wikipedia:Xosh keldińiz!

Qaraqalpaqsha Wikipedia logotipi

Assalawma áleykum húrmetli zamanlasım!

Wikipedianıń qaraqalpaq tiline arnalǵan bólimine – Qaraqalpaqsha Wikipediaǵa xosh keldińiz!

Siz álleqashan Wikipedia kóp tilli onlayn enciklopediyası haqqında esitken shıǵarsız. Dúnya júzi xalıqlarınıń tilleri qatarında qaraqalpaq tili de Wikipediada óz bólimine iye.

Qaraqalpaqsha Wikipedianıń baslı maqseti dúnya júzilik internet tarmaqlarında qaraqalpaq tilinde jazılǵan paydalı hám isenimli maǵlıwmatlardı kóbeytiw bolıp tabıladı.

Basqa tillerdegi wikibólimlerge salıstırıp qaraǵanda ásten rawajlanıp atırǵan Qaraqalpaqsha Wikipedianıń dárejesi xalqımızdıń hárbir perzentiniń oǵan qosqan úlesine tikkeley baylanıslı.

Qaraqalpaqsha Wikipedia administraciyası sizge sálem jollay otırıp, ana tilimiz keleshek áwladlarǵa miyras sıpatında jaqsı saqlanıp jetip barıwı ushın joybarda volontyor sıpatında belsendi qatnasıwǵa shaqıradı.

Men Qaraqalpaqsha Wikipediaǵa ne bere alaman?

Qaraqalpaqsha Wikipediadaǵa úles qosıw ushın paydalanıwshı birinshi gezekte qaraqalpaq tiliniń imla, grammatika hám punktuaciya qaǵıydaların, sózlik qorın jaqsı meńgergen bolıwı kerek.
Wikipediada maqalalardı jaratıwdıń eń keń tarqalǵan usılı – bul basqa tillerden awdarıp maqala jaratıw. Sol ushın, ekinshiden, qaysı bir shet tilin (solar qatarı túrkiy tillerdi) biletuǵın hárbir qaraqalpaq tili sóylewshisi joybar ushın júdá qımbatlı paydalanıwshıǵa aylanıwı múmkin. Joqarıda aytıp ótilgenindey, bul enciklopediya onlayn kórinisinde, bunda maqalalar onlay jaratıladı hám tolıqtırıp barıladı. Solay eken, úshinshiden, joybardıń saytın texnikalıq jaqtan qollap-quwatlawda informaciyalıq texnologiyalardı jaqsı biletuǵın paydalanıwshılar óz kómegin usınıwı múmkin.

• Qaraqalpaq tilin biliwshiler: jaratılǵan betlerdegi (maqalalardaǵı) qátelerdi durıslaw, Qaraqalpaqsha Wikipedia saytınıń interfeysindegi qáteler haqqında administraciyaǵa xabar beriw, Wikisózlik joybarın rawajlandırıw.
• Inglis tilin biliwshiler – Qaraqalpaqsha Wikipedia saytınıń interfeysindegi qaraqalpaqshaǵa awdarılmaǵan tekstlerdi (negizi standart sazlawlar boyınsha tekstler inglis tilinde, biraq Qaraqalpaqsha Wikipediaǵa baza sıpatında qazaq tili kórsetilgeni ushın ayırım tekstler Qazaqsha Wikipediadaǵı kóriniste turǵan bolıwı itimal) translatewiki arqalı qaraqalpaqshaǵa awdarıw, Inglisshe Wikipedia (ótiw ushın – en:) yamasa Inglisshe (ápiwayılastırılǵan) Wikipedia (ótiw ushın – simple:) wikibólimlerindegi qızıqlı maqalalardı Qaraqalpaqsha Wikipediaǵa awdarıp qosıw, (keleshekte:Qaraqalpaqsha Wikipediada bar, biraq Inglisshe Wikipediada joq maqalalardı qaraqalpaqshadan inglisshege awdarıp, sol wikibólimlerge qosıw).
• Rus tili biliwshiler – Russha Wikipediadaǵı (ótiw ushın – ru:) qızıqlı maqalalardı Qaraqalpaqsha Wikipediaǵa awdarıp qosıw, (keleshekte:Qaraqalpaqsha Wikipediada bar, biraq Russha Wikipediada joq maqalalardı qaraqalpaqshadan russhaǵa awdarıp, sol wikibólimge qosıw).
• Basqa túrkiy tillerdi biliwshiler – túrkiy tillerdegi salıstırmalı iri wikibólimlerdegi (mısalı, Túrkshe Wikipedia (ótiw ushın – tr:), Ózbekshe Wikipedia (ótiw ushın – uz:), Qazaqsha Wikipedia (ótiw ushın – kk:)) qızıqlı maqalalardı Qaraqalpaqsha Wikipediaǵa awdarıp qosıw, (keleshekte:Qaraqalpaqsha Wikipediada bar, biraq joqarıdaǵı túrkiy tillerde joq maqalalardı qaraqalpaqshadan awdarıp, sol wikibólimlerge qosıw).
• Informaciyalıq texnologiya qánigeleri – Qaraqalpaqsha Wikipedia saytınıń interfeysin ıqshamlastırıw, kórkemlestiriw, hár túrli fayllardıń arnawlı programmalar jórdeminde qaraqalpaqsha kórinislerin dóretip, Wikiqoymaǵa qosıw, basqa wikibólimlerde paydalı gadjetler hám botlardı Qaraqalpaqsha Wikipedia ushın lokalizaciyalaw yamasa jaratıw.
• Fotosúwretshiler – ózleri túsirgen fotolardı Wikiqoymaǵa qosıw.

Wikipedia sizge ne beredi?

Wikipedia onlayn enciklopediya joybarınıń barlıq til bólimleri volontyorlar járdeminde jaratılǵan hám rawajlandırılıp barıladı. Sonlıqtan bul jerde qatnasıp, jeke maqset ushın qaysı bir kórinistegi qarjılay payda alıwdı kózde tutıwshı mexanizm joq.
Álbette, tańlawlar yamasa konkurslar shólkemlestirilse, belsendi qatnasıwshlar qáwenderler tárepinen qoyılǵan bahalı sawǵalardı utıp alıwı múmkin. Biraq joybardıń sizge beretuǵın tiykarǵı birden-bir hám dawamlı nársesi – bul bilim.
Sonıń menen bir qatarda, siz Qaraqalpaqsha Wikipedianı rawajlandırıw boyınsha óz ideyalarıńızdı usınıp, Wikimedia Fondı tárepinen grantlar utıp alıwıńız múmkin. Eger wikijoybarlarda turaqlı túrde hám belsendi qatnasıp, belgili jetiskenliklerge erisseńiz, Wikimedia Fondınıń hár jılı ótkeriletuǵın xalıq aralıq konferenciyası – Wikimaniaǵa jollama alıwıńız múmkin.

Ulıwmalastırıp aytqanda siz Qaraqalpaqsha Wikipediada qatnasıw arqalı bir tárepten basqalarǵa óz bilimin bayıtıwǵa járdem berseńiz, ekinshi tárepten ózińizdiń bilim sheńberińizdi keńeytiwge de erisesiz.

Eń baslısı, siziń úlesińiz keleshek áwladlarǵa ana tilimizde jazılǵan úlken kólemdegi maǵlıwmatlar bazasın miyras etip qaldırıwǵa xızmet etedi.

Húrmet penen Qaraqalpaqsha Wikipedia administraciyası