Fotosúwretleme

Fotojurnalistikanıń janrları ishinde fotosúwretlemeniń ózgesheligin hám ornın biliw ushın onıń kelip shıǵıwına toqtawımız kerek. Bul janrdın tuwılıwı erte dáwirdegi sociallıq fotografiya menen sheklenbey texnikalıq múmkinshiliklerine qarap turmıstıń sociallıq qarama-qarsılıqların kórsetiwge tırıstı. Ol kúndelikli turmıstı hújjetli súwretlew menen sheklenbedi. Al, fotografiya arqalı óz kewil keshirmelerin bildiriw jolların izledi.

Turmıstıń qısqa epizodların túsiriw arqalı fotosúwretlemeniń fotozametka menen jaqınlıǵı bar. Al, turmıstıń bir emes, bir neshe táreplerin súwretlewi bul janrdıń fotoocherk penen únlesliginen derek beredi. Fotosúwretleme hem fotoocherk janrlarınıń taǵı bir jaqınlıǵı - olardıń poetizaciyalılıǵında. Eki janrda da emocionallıq bar. Fotosúwretleme bul házirgi zamannıń bir yamasa birneshe belgilerin súwretleytuǵın janr. Janrdıń atınan kórinip turǵanday-aq, bul kartina emes, al shtrix, natural sızılma. Bul janr adamnıń ishki dúnyasın súwretlew menen ózgeshelenedi. Sonlıqtan bul janr emocionallıq, intonaciyalıq bayanlaw boyınsha basqa janrlardan ajıralıp turadı. Qısqası, súwretlew fotosúwretlemeniń bir túri.

Óz gezeginde fotosúwretleme de túrlerge ajıraladı. Kúndelikli baspasóz betlerinde avtor sózi az bildirilgen fotosúwretlemeniń ekinshi túrinde avtordıń sezimleri beriledi. Mısalı, toǵaydıń sulıwlıǵı, japıraqlardıń túsiwi, balanıń quwanıshı... Súwrettiń obiekti etip qorshaǵan ortalıq shınlıq emes, al, adamnıń fotoreporterdıń ishki tuyǵıları alınadı. Fotosúwretlemeniń bul túrin lirikalıq dep qarawǵa boladı.