Fotojurnalistika janrları

Fotojurnalistika da jurnalistikaniń basqa túrlerindey shınlıqtı biliw processinde waqıyanı anaw yamasa mınaw janrdıń ishinde beredi. Janr - bul forma menen mazmunnıń specifikalıq qásiyetiniń birikken shıǵarması. Bir neshe onlaǵan jıllar ishinde fotojurnalistika janrlarınıń belgili sisteması qáliplesti. Bul processke álbette óz gezegi menen baspasózdiń tásiri bolsa, ekinshi jaǵınan fotografiya, kórkem óner sıpatında tán alına basladı. Házirgi zaman praktikasında baspasózdiń periodikalıq illyustraciyasın mınaday toparlarǵa bóliwge boladı: fotozametka, fotoreportaj, fotosúwretleme, fotokorrespondenciya, fotoocherk hám fotomontaj. Bul fotojurnalistika janrları belgili, keskin maqsetke bola ajıraladi. Fotozametkanıń tiykarında jeke fakt, fotoreportajda waqıya, fotoocherkte qubılıs turadı. Baspa sózde jeke fakt bolsa zametkaǵa, jámiyetlik qubılıstı sáwlelendiriwde yaki jeke adam tuwralı pikir júritip minez-qulqın ashqanda ocherk janrı talaplarına juwap beredi. Ekinshi ózgesheligi - sıpatlamanıń shıǵarmaǵa júkleniwinde. Fotozametkada fakt tek ǵana baslı máseleni súwretlep tolıq emes túrde beriledi. Fotoreportyor waaqıyanı - faktti dálilleydi. Úshinshi belgisi - fotojurnalistlik shıǵarmalardıń kompoziciyalıq ózgesheligi. Máselen, fotoreportaj benen fotoocherkti salıstırayıq. Birinshisinde, shınlıqtıń ózgeriwi hám montajlıq súwretlerde izbe-izliktiń támiynleniwi bolsa, ocherk jazıwshıǵa tek hújjetlilik, shınlıqtı kórsetiq arqalı sheklenbey, juwmaqlardıń durıslılıǵın támiynlewi kerek. Sol jaǵdayda ol súwretlenip atırǵan waqıyanı kórgizbeli anıq kórsetiw ushın qollanıladı.

Bóliniwi:

Fotojurnalistika janrların negizinen 2 toparǵa: informaciyalıq hám publicistikalıq dep ajıratıw kerek. Birinshisine fotozametka, fotosúwretleme, fotoreportaj kirse; fotokorrespondenciya, fotoocherk, fotomontaj publicistikalıq janrlarǵa jatadı.

Fotojurnalistikanıń janrlıq túrlerge bóliniwi jurnalistikadan parıq qıladı. Negizinen jurnalistika informaciyalıq, analitikalıq hám kórkem publicistikalıq túrlerge bólinedi. Fotoreportyor kóp materialdıń ishinen eń kerekli jámiyetlik áhmiyetke iye problemalı máwritlerdi tawıp túsiriwi kerek.