Ernazar Alakóz

Ernazar Alakóz - teńi-tayı joq xalıq qaharmanı. Bul haqqında kórnekli tariyxshı alım akademik Sabır Kamalov «XVII - XIX ásirlerdegi qaraqalpaqlar» degen miynetinde ayqın dálillep kórsetken. Sebebi, ǵárezsizlik ushın bolǵan gúresler hárbir xalıqtıń tariyxınıń tiykarı. Al, Maman biy menen Ernazar Alakóz qaraqalpaqlardıń ǵárezsizligi jolında ólimge basın tikken xalıq batırları edi. Aydos biy haqqında xalıq ańızlarında hár qıylı pikirler aytılǵan. Bul ańızlarǵa qaraǵanda Aydostıń qol-qanatı, tiregi eki inisi - Begis penen Mırjıq bolıp, olar, shınında da, batır adamlar bolǵan. Aydostıń ármanların iske asırıw ushın gúresken adam onıń inisi Mırjıqtıń balası Ernazar Alakóz. Ernazar - ismi, alakóz - onıń laqabı. Ol sonday túr-túsi kelisken, palwan adam bolǵan. Adamlar onıń batırlıǵınan ǵana emes, bálkim, kózqarasınıń ózinen aybınatuǵın bolǵan. Alakóz laqabı onıń kóziniń janıp turǵan ótkirligi ushın berilgen. Ol ákesinen jaslay jetim qalıp, anası Qumardıń tuwısqanı - dayılarınıń qolında tárbiyalanǵan.

Tuwılǵan sánesi	1806
Qaytıs bolǵan sánesi	1856