Arablar qozǵalańı

Afrika materigindegi mámleketlerde puqaralıq jurnalistikanıń ayqın kózge taslanıwına sebep bolǵan waqıya Mısırdaǵı " Arablar qozǵalańı" waqıyası boldı. 2011-jıldıń basında arablar qozǵalańı baslanıp, puqaralar aymaqtaǵı tamırı tereńge en jayǵan basshılardı lawazımınan bosatıwǵa háreket etti. Mısır húkimeti ol jerdegi tártipsizliklerdiń aldın alıw maqsetinde Internet hám mobil tarmaqlardı sheklewge háreket etkeni menen, onıń ilajı bolmadı. Kerisinshe, bunday waqıtta sociallıq tarmaqlar hám Internet áhmiyetli rol oynap, mámlekette puqaralıq jurnalistikanıń jedel rawajlanıwına sebep boldı. Bul haqqında C.C.Radsch óziniń "Cyberactivism and CitizenvJournalism in Egypt: Digital Dissidence and Political Change" atlı kitabında keltirip ótip, Mısırlı blogerler húkimettiń informaciya monopoliyasın saplastırıw hám avtoritar rejim, onıń puqaraları ortasındaǵı dinamikanı ózgertiw ushın puqaralıq jurnalistika hám kiberaktivizmnen qalay paydalanǵanlıǵı haqqında sóz etken C.C.Radsch óziniń basqa miynetinde bolsa, Mısırda hárekettegi sistemanıń huqıqıylıǵın támiyinlew, pikir bildiriw hám qatnasıw huqıqların talap etip, bunda ózgerisler ushın toparlıq siyasıy gúreske jaslar basshılıǵındaǵı texnologiya baǵdarlanǵan sociallıq hárekettiń basshılıq etkenligin, sociallıq ádilsizlik hám cenzuraǵa qarsı gúresiwde Internet hám sociallıq tarmaqlardan ónimli paydalanılǵanlıǵın keltirip ótedi.