Tamır

Bizge belgili gúlli ósimliklerdiń organları vegetativ hám generativ organlarǵa bólinedi. Vegetativ organlarǵa tamır, paqal hám japıraq, al generativ organlarǵa gúl, miywe hám tuqımlar kiredi. Ósimlik organları birgelikte birden-bir organizmdi quraydı. Tamır – ósimliktiń paqal yaki denesin jerge birlestirip, topıraqtaǵı suw hám onda erigen azıqlıq zatlardı sińdirip alıp, olardı ósimliktiń jer ústi bólimine jetkerip beretuǵın organı. Tamırdıń áhmiyetli ózgesheliklerinen biri sonnan ibarat, ol japıraq payda etpeydi. Kópshilik ósimliklerdiń tamırında azıqlıq zatlar toplanadı. Al, geypara ósimliklerdiń tamırı vegetativ kóbeyiw organı esaplanadı. Ósimliklerdiń jaqsı ósiwi hám rawajlanıwı, terek hám putalardıń iri, quwatlı shaqalar payda etip, uzaq jasawı kóp jaǵınan tamırǵa baylanıslı.