Tóresh Allanazarov
Toresh Allanazarov - rejissyor hám dramaturgiya izertlewshisi. 1916-jılı Qońırat rayonınıń Sorkól awılında tuwılǵan[2].
| Tuwılǵan sánesi | 11-sentyabr 1916 |
|---|---|
| Qaytıs bolǵan sánesi | 4-avgust 2000[1] (83 jasta) |
Iskerligi
redaktorlawDáslep eski mektepte, soń jańa mektepte oqıǵan. 1933-jılı Tórtkúldegi pedtexnikumdı pitkerip, Kegeylide muǵallim bolıp isleydi. Toresh Allanazarov 1934-39-jılları Moskvadaǵı Lunacharskiy atındaǵı mámleketlik teatr óneri institutında bilim aladı. 1945-jılǵa shekem qaraqalpaq mámleketlik teatrında aktyor hám rejissyor[3], 1951-jılı Tashkenttegi teatr institutınıń rejissyorlıq fakultetin pitkerip kelip, respublikalıq mámleketlik tetrda bas rejissyor bolıp isleydi.
Ol 1959-1965-jılları N.Dáwqaraev atındaǵı Til hám ádebiyat institutında kórkem-óner bólimin basqarsa, 1965-1967-jılları respublikanıń mádeniyat ministri, soń Tashkent mámleketlik mádeniyat institutında kafedra meńgeriwshisi (1974-1983) 1983-jıldan baslap N.Dáwqaraev atındaǵı Til hám ádebiyat institutında ilimiy xızmetker wazıypasın atqaradı.
T.Allanazarov ádebiy dóretiwshilik penen 1939-jıldan baslap shuǵıllanǵan. Ol J.Aymurzaev penen birge “Ráwshan” (1956), A.Begimov penen birlikte “Ǵárip ashıq” pyesaların dóretti hám saxnalastırdı. Ol M.Gorkiydiń “Dushpanlar”, “Vassa Jeleznova”, A.Qahhardıń “Jańa jer”, I.Frankonıń “Urlanǵan baxıt”, Molyerdiń “Tartyuf”, Ǵ.Músirepovtıń “Qız jipek” pyesaların awdarǵan.
Ilimiy jumısları
redaktorlawDramaturgiya tariyxı boyınsha T.Allanazarovtıń “Qaraqalpaq sovet teatrı” (1966), “Teatr hám dramaturgiya” (1979), “Qaraqalpaq sovet dramaturgiyası tariyxınıń geypara máseleleri” (1987) hám basqa da izertlewleri bar.
T.Allanazarov 1964-jılı “Qaraqalpaq sovet teatrınıń rawajlanıw jolları” degen temada kórkem-óner tanıw boyınsha kandidatlıq dissertaciyasın jaqlaǵan. “Qaraqalpaqstanda mádeniy aǵartıw mákemelerininiń qáliplesiw derekleri” degen atamadaǵı oqıw quralınıń avtorı.
Sıylıqları
redaktorlawT.Allanazarov “Qaraqalpaqstan xalıq artisti” (1944), “Ózbekstan Respublikasına miyneti sińgen kórkem-óner ǵayratkeri” (1957), “Ózbekstan xalıq artisti” (1963) degen húrmetli ataqlarǵa iye. “Húrmet belgisi” ordeni hám medallar menen sıylıqlanǵan. Ol Qaraqalpaqstan Respublikası Berdaq atındaǵı mámleketlik sıylıqtıń laureatı boldı.
T.Allanazarov 1955-jıldan Jazıwshılar awqamınıń aǵzası.