Miyirbiykeler kúni

Miyirbiyke

Miyirbiykelerdiń kásip bayramı urıs dáwirinde olarǵa dúnyadaǵı birinshi qayırqomlıq xızmetin kórsetken ataqlı ingliz áyellerinen biri Florens Naytingeyldiń tuwılǵan kúninde bayramlanadı.

Florens Naytingeyl urısta dala emlewxanalarında miyirbiyke retinde islegen hám miyirbiyke jumısınıń tiykarshısı hám de bas úgitshisi bolǵan. Ol 38 járdemshisi menen birgelikte sanitariya hám jaradarlarǵa ǵamxorlıq qılıw qaǵıydaların turmısta qollanıp kórdi. Nátiyjede, 6 aydan kem waqıt ishinde emlewxanalarda ólim dárejesi 42 payızdan  2, 2 payızǵa  tústi.

Sonıń menen birge, Naytingeyl armiyadaǵı medicinalıq xızmetti shólkemlestiriw hám miyirbiykelerdiń jumısın ǵalabalastırıwǵa eristi.

1912-jılda Florens Naytingeyl medalı shólkemlestirildi. Bul sıylıq ele de dúnyadaǵı miyirbiykeler ushın eń dańqlı sıylıq esaplanadı.

Miyirbiykeler jumısına qaray túrli taypalarǵa bólinedi. Mısalı, bas miyirbiyke, úlken miyirbiyke, palata miyirbiykesi, emleytuǵın miyirbiyke, xirurgiya miyirbiykesi, rayon miyirbiykesi hám dieta miyirbiykesi (medicinalıq awqatlanıw ushın juwapker) taypaları bar. Sonıń menen birge, qánigelesken shıpakerler menen nawqaslardı qabıl etiwshi miyirbiykeler de bar.

Derek: paxtachi.uz