Meshit

Shımbay rayonı «Xan» jome meshiti

Qaraqalpaqstan Respublikası Shımbay rayonı «Xan» jome meshiti úlken tariyxqa iye bolıp, ol burınǵı awqam dáwirinde de óz iskerligin alıp barǵan. Sonday-aq, eski dúzim gezinde Qaraqalpaqstan Respublikası boylap tek 3 meshit, yaǵnıy Xojeli, Tórtkúl rayonları hám Shımbaydaǵı usı «Xan» meshitleri ǵana namazxanlar ushın xızmet kórsetip kelgen.

Uzaq jıllar dawamında bul meshitte Qalimbet axun, Rahmatullah iyshan, Mahmud iyshan, Xalil axun, Sherniyaz axun hám Ram iyshan sıyaqlı ulamalarımız imamlıq etken. Sonıń ishinde Sálmen iyshan babamızdıń da ol jerde xızmet qılǵanı aytıladı.

Burınǵı awqam tarqaǵan waqıtta, yaǵnıy 1990-jılları xalıqtıń járdemi menen meshit qurılısı jańadan boy tiklep, qayta iske túsken. Bul qurılısta 1981 – 2015-jıllar aralıǵında imamlıq qılıp kelgen Mahmud Abdurazzakov aytarlı miynet kórsetken. Sol jıllarda Orta Aziya hám Qazaqstan musılmanları basqarması baslıǵı bolǵan, marhum shayx Muhammad Sadıq Muhammad Yusuf háziretleri respublikadaǵı barlıq oraylıq meshitler qatarı usı «Xan» meshitiniń de tırnaq tasın qoyıp bergen.

Sol dáwirde bul jerde Mahmudjan Adburazzakov imam-xatib bolǵan (1991 – 2015). 2015-jıl may ayınan baslap 2021-jıl 14-sentyabr kúnine shekem Bekmurza Seytjanov, 2021-jıl 25-oktyabrden házirge shekem Dáwranbek Allambergenov imam-xatiblik qılıp kelmekte.

1998-jıl 1-mayda qabıl etilgen «Hújdan erkinligi hám diniy shólkemler haqqında»ǵı nızamnıń jańa ózgerisine góre meshittiń ustav hám tiyisli hújjetleri rásmiylestirilip, 1998-jıl 11-sentyabrde Qaraqalpaqstan Respublikası Ádillik ministrliginde qayta dizimnen ótken.

Meshitte 2015 – 2021-jıllarda iri kólemli qayta ońlaw isleri alıp barıldı. Házirgi waqıtta 1000 nan artıq mómin-musılmanlardı óz ishine jámley aladı.

Bul jerde namaz oqıw ushın ulıwmalıq zal 637 m² bolıp, onıń táhárátxanası (qájetxana, ǵusılxana) 126 m² maydandı iyeleydi.

Meshit eki úlken kiriw esigi, 1 imam-xatib xanası, 1 imam-nayıb xanası, bir waqıttıń ózinde 20 dan aslam adamǵa xızmet kórsetiwshi táhárátxana, 1 májilisler zalı, 2 úlken namaz oqıw zalı, 1 asxanadan ibarat.

Házirgi waqıtta pútkil Shımbay rayonı xalqına xızmet kórsetip kelmekte.