Meduza

Meduzalar-denesi birqansha tınıq, shiyshe tárizli irkildek zattan ibarat. Forması sayamanǵa uqsaydı.Sayamannıń tómengi tárepiniń ortasında jaylasqan awız tesiginiń átirapında hám sayaman shetinde júdá kóp qarmalawshıları boladı.Dene diywalı kletkaları barlıq ishek quwıslılar sıyaqlı eki qabattan turadı, biraq aralıq zatı júdá kúshli rawajlanǵan. Meduzalardıń sayamanı qısqarǵanda onıń astındaǵı suw kúsh penen atılıp shıǵıp,reaktiv háreket payda boladı. Meduzalar jırtqısh bolıp, shayan tárizliler,qurtlar, balıq shabaqları hám basqa da mayda suw haywanları menen awqatlanadı. Olar oljasın atılıwshı talshıqları járdeminde hálsiretip,awızdıń dógeregindegi úlken qarmalawshıları járdeminde awzına saladı. Ayırım meduzalardıń atılıwshı talshıqları kúydiriwshi qásiyetine iye. Arqa teńizlerde ushırasatuǵın polyar meduzası hám Qara teńizde tamır awız meduza shomılıwshılar ushın qáwipli boladı. Teńiz tarelkası dep atalatuǵın, barlıq teńizlerde keń tarqalǵan aureliya meduzası adam ushın zıyansız. Meduzalar balıqtıń shabaqların jep, balıqshılıqqa birqansha zıyan tiygizedi.