Longread
Longread - búgingi zamanagóy jurnalistikada kólemli tekst arqalı oqıwshılardı qızıqtırıwdıń usıllarınıń biri.
Internet tarmaǵında uzın-shubay tekstti kópshilik oqıy bermeydi. Óytkeni, globallıq tarmaqtan adamlar qısqa hám anıq informaciya alıw ushın paydalanadı. Longread ataması inglis tilindegi «long» - uzın, kólemli, «read» - oqıw degen sózlerdiń birikpesinen kelip shıqqan. Longridti oqıwǵa adamlar kóp waqtın sarplaydı. Biraq, longrid bul siz oylaǵanday zeriktirip jiberetuǵın ápiwayı tekst emes. Bul tekst, video, infografika, prezentaciya hám muzıkanı talap etetuǵın kompleksli informaciya bolıp tabıladı. Bul elementler bir-biri menen tıǵız baylanıslı boladı. Olar tek tekstti tolıqtırıp ǵana qoymastan, oqıwshıǵa jańa informaciya berip otıradı. Bunday tekstte biz joqarıda sanap ótken bóleklerdiń bir-biri menen logikalıq úylesimliligi áhmiyetli esaplanadı. Longrid birneshe tema átirapına qurılmaydı, kerisinshe, onda tek ǵana bir tema dógereginde izertlew jumısları sáwlelenedi. Longrid – analitikalıq mazmunǵa iye informaciya dáregi. Longrid avtorlarınıń tiykarǵı maqseti oqıwshınıń dıqqatın ózine qaratıp, oǵan ózgeshe usılda waqıyanı bayanlawdan ibarat boladı. Onda kóterilgen másele boyınsha anıq, dál sheshimler beriliwi maqsetke muwapıq boladı.