Jiyrenshe Sheshen

Qaraqalpaqlardıń arasında Jiyrenshe degen aqıllı, sózdiń mánisin keltirip sóyleytuǵın sheshen adam bolıptı. Onı xalıq kórgenlikten Jiyrenshe sheshen dep ataǵan. Sol zamanda Jánibek degen xan bolıp, Jiyrensheni sózden utıp óltiriw ushın kóp hiyle islegen. Biraq ta, Jiyrenshe tapqırlıǵınan, aqıllılıǵınan xannıń qıyın sorawlarına durıs juwap berip, ólimnen aman qalıp otırǵan. Jiyrenshe menen Jánibek xan arasındaǵı gúrrińler xalıq arasında oǵada keń taralǵan.

Sońǵı izertlewlerde Jiyrenshe sheshendi Jánibek xannıń zamanında jasaǵan, tariyxta bolǵan adam sıpatında kórsetedi. Jiyrensheniń ańızları 1962-jılı «Qaraqalpaqstan» baspasında «Qaraqalpaq xalıq legendaları hám anekdotları» degen toplamda basıldı. Sonday-aq, 1992-jılı A. Pirnazarovtıń «Jiyrenshe sheshen» degen miyneti baspadan shıqtı.