Gúlsara Jumaniyazova

Gúlsara Jumaniyazova (кирил. Гүлсара Жуманиязова, русс. Гулсара Жуманиязова) - elge belgili aktrisa. Ol Qaraqalpaqstan Respublikası Taxtakópir rayonı, Bórshitawdıń eteginde, Qaratereńniń boyında tuwılǵan.

Dóretiwshiligi

Teatrda 1988 jıldan baslap óz jumısın baslaǵan. Gúlsara Jumaniyazova uzaq jıllıq dóretiwshilik iskerligi dawamında elge belgili húrmetli aktrisa ataǵına iye boldı. Ol teatr saxnasında 40 tan aslam roller atqardı. Atap ótsek, “Injıqtıń muhabbatı”nda Ayjamal, “Kóleńke”de Nazlı, “Ene”de Salima, “Keshikken muhabbat”ta Orıngúl, “Ǵárib ashıq”ta Húrlixa, Ǵáriybtiń anası Abadan, “Sháriyar”da Jalmawız kempir, “Úsh boydaq”ta Kúnsulıw, “Alpamıs”ta Arzayım, “Eń sulıw kelinshek”te Zuhra, “Iyman” spektaklinde Aysha rollerin atqardı. “Tánha juldız”da Jámiyla, “Edige”de Qarashash, “Jámiyla”da Gúlzada, “Gúl almaǵan gózzallar” Zuhra, “Qız jigirmaǵa shıqqanda”, “Anvar hám Rano”da Gúlshan hám basqa rolleri menen tamashagóy kewlinen orın aldı.

Sonday-aq, Gúlsara teatrda saxnalastırılǵan “Ájiniyaz”, “Tumaris”, “Gúlayım”, “Berdaq”, “Ayjamal”, “Qırıq qız” baletinde hám barlıq muzıkalı spektakllerde rol atqarıp kelmekte.

Ol tek aktrisa retinde ǵana emes, al rejissyor, rejissyor assistenti retinde de teatrda ótkeriletuǵın “Jańa jıl sawǵası”, “Gózzallarǵa sawǵa” teatrlastırılǵan show koncertlerinde óz dóretiwshiligin anaǵurlım kórsetip, el húrmetine bólengen aktrisa.

Gúlsara Jumaniyazova 2009 jılı Mısır Arab Respublikasında ótkerilgen XXI xalıqaralıq eksperimental teatrlar festivalında teatr jámááti menen “Eń sulıw kelinshek” spektakli menen qatnasıp, onıń atqarıwındaǵı Zuhra obrazı qánigeler tárepinen joqarı bahalandı.