Faciya — (latınsha facies — sırtqı kórinis mánisin ańlatadı) taw jınıslarınıń litologiyalıq quramı birdey, relyef dúzilisi, ıǵallanıwı birdey, mikroklimatı, topıraqları, ósimlik hám haywanat dúnyası birdey, yaǵnıy onı payda etiwshi komponentlerine tán bolǵan belgileriniń birdeyligi menen sıpatlanatuǵın eń ápiwayı dúzilgen hám eń kishi geosistema bolıp esaplanadı. Faciyalar relyeftiń mikroformalarına tuwrı keledi. Mısalı, jaralardıń ishi, pás jerlerdiń túbi faciyaları. Faciyalar geosistemalardıń ishinde eń ashıǵı esaplanadı hám tek ǵana qońsı faciyalar menen baylanıslı bolǵan sharayatta ǵana qáliplesedi, rawajlanadı. Olar ózinen úlken bolǵan basqa geosistemalarǵa qaraǵanda sırtqı kúshler tásirine beriliwsheń hám ózgeriwsheń boladı. Buǵan sebep faciya sheńberinde onıń komponentleri arasındaǵı baylanıs basqa geosistemalardaǵıǵa qaraǵanda mort, tez zıyanlanıwshań, sırtqı faktorlar tásirine shıdamsızraq ekenligi bolıp tabıladı. Sonıń ushın da, insannıń xojalıqtaǵı iskerliginiń geosistemalarǵa tásiri hám onıń ózine tán aqıbetleri dáslep faciyalar kóleminde júz beredi.