Erkinbay Qutıbaev

Erkinbay Meńlibaevich Qutıbaev (1972-jıl 28-avgust, Nókis) — muaytayshı, kikboksshı. «Ózbekstan maqtanıshı» (1999). Ózbekstan Respublikasında xızmet kórsetken sportshı (2004), Qaraqalpaqstan Respublikasında xızmet kórsetken sportshı (2002). E. Qutıbaev dáslep sporttıń erkin gúres hám boks túrleri menen shuǵıllanıp, kikboks boyınsha Evropa chempionı bolǵan (1994, Rimini). Gúrestiń muaytay túrinde úlken dańqqa eristi.

Ol 91 kg salmaqta Ózbekstan (1997—2004), Aziya oyınları (1998, Bangkok), jáhán (1995, 1997, 1998, 2002, 2004, Bangkok) chempionı. Kiev texnika universitetin tamamlaǵan (1994), Ózbekstan Respublikası Sırtqı ekonomikalıq baylanıslar ministrligi bas qánigesi (1997—2001), Qaraqalpaqstan Respublikası dene tárbiyası hám sport komiteti baslıǵı (2001—2002), Ózbekstan balalar sportın rawajlandırıw fondınıń Qaraqalpaqstan filialı direktorı (2002— 2004), Nókis olimpiada rezervleri kolledji direktorı (2004-jıldan). Ózbekstan Respublikası Oliy Májlisi Senatı aǵzası (2005), Qaraqalpaqstan Respublikası Joqarǵı Keńesi deputatı (2005). Ózbekstan Respublikası Mádeniyat hám sport isleri ministriniń 1-orınbasarı (2006-jıldan).