Birinshi televiziyalıq kórsetiw

5 noyabr — Qaraqalpaqstanda eń birinshi televiziyalıq kórsetiw baslanǵan kún.

Tariyxı

1964-jıldıń 5-noyabr kúni jergilikli waqıt penen saat 19.00 de Nókis, Taqıyatas, Xojeli qalalarındaǵı ayırım úylerdiń televizorlarında «Nókis kórsetedi» degen titr payda bolǵan. Usı kúni qaraqalpaq hám orıs tillerinde «Jańalıqlar» kórsetilgen. Birinshi diktorlar – Orazgúl Óteniyazova menen Svetlana Shapochnikovalar fotosyujetler fonında miynet jámáátleriniń raportları tuwralı aytqan. Birinshi telejańalıqlardı qaraqalpaq tilinde Ǵalım Seytnazarov hám Qarmıs Dosanov, al orıs tilinde Viktor Kopalovlar tayarlaǵan. Birinshi mártebe basqarıw pultinde otırıp, qaraqalpaqsha birinshi kórsetiwdi Quwat Ábdireymov penen Kiyik Ábdireymovalar efirge shıǵarǵan. Al, birinshi teleoperatorlar P.A.Begimov hám Q.Ernazarovlar edi. Qaraqalpaqstan televideniesi janrlarınıń rawajlanıwına eń kóp úles qosqan birinshi telejurnalistlerdiń biri Ǵalım Seytnazarov boldı. Ol tek ǵana «telejańalıqlar» tayarlawǵa qatnasıp qoymastan, saltanatlı bayram kórsetiwlerin, kishigirim óndirislik temadaǵı kórsetiwlerdi de birinshi bolıp tayarlap, televidenie janrlarınıń kóbeyiwine tiykar salǵan. Xalıqtıń kóp qızıǵatuǵın «Jańalıqlar» informaciyalıq baǵdarlamasın «Xabar» dep atawdı hám titrdi globus fonında, onı aylanıp turǵan túrinde beriwdi usınǵan hám bir qansha qıyınshılıqlaǵa qaramay bunı ámelge asırǵan. Sonday-aq, Ǵalım Seytnazarov oǵada sabırlılıq penen efirge ketetuǵın barlıq diktor oqıytuǵın materiallardı, shıǵıp sóyleytuǵın tekstlerin ózi oqıp, xudojniklerdiń tayarlaǵan titr – bezewlerin birimlep kórip, kinojurnallar menen telefilmlerdi, kórkem filmlerdi efirden aldın kórip bolıp jiberetuǵın bolǵan. Solay etip, dáslepki waqıtları kúnine bir neshe minutliq xabarlar efirge berilip turǵan Qaraqalpaqstan televideniesiniń 1965-jıldan baslap háptesine tórt márteden 2,5 saatlıq telebaǵdarlamaları tamashagóyler dıqqatına usınılǵan. Sońǵı jıllar dawamında efir saatları hám kúnleri uzaytırıp barılǵan. 1991-jıldan soń Qaraqalpaqstan televideniesi Ózbekstan Mámleketlik Teleradiokompaniyası (házirgi Ózbekstan NTRK) quramına kirdi.

2002-jılı Qaraqalpaqstan Respublikasınıń Teleradiokompaniyası bolıp, qayta shólkemlestirildi.

Dárekler

Qaraqalpaqstan Respublikası Oraylıq Mámleketlik arxiv fondınan