Bet ashar - o'zinin' mazmunı ha'm forması boyınsha og'ada a'hmiyetli, jasawı jag'ınan uzaq keleshekke iye da'stu'r qosıqlarının' biri.

Bet ashardın' aytılıwı jan'a tu'sken kelinshektin' kelgen jan'a u'yinin' adamları, sol awıldın' belgili adamları menen tanıstırıwg'a, adamlardın' kimligin aytıp olardın' minez-qulqındag'ı a'hmiyetli belgilerdi ashıp beredi. Geyparlarının' yumor tili menen sol adamnın' jaqsı yamasa jaman qa'siyetlerinen jıynalg'an xalayıqqa bayanlawdan ibarat. Bet ashardı ha'mme asha bermeydi, onı aytıwg'a uqıplı, shayırshılıqqa beyimi bar, aytıw ushın dawıs tolqınları kelisetug'ın adamlar g'ana aytadı. Bet ashardın' o'zine ılayıq kirispesi boladı. Bul kirispede kelinshekke aqıl-na'siyat berip, onın' tuwrı jolda ju'rip, jaqsı bolıwın na'siyatlaydı. Mısalı:

Jaqsı adam jamannın',
Ko'pkin ashar kelinshek,
Keshe shıqsan' u'yin'nen,
Bet asharı kelinshek...
... Eki jaqsı bas qossa,
Birin-biri qıymaydı,
Eki jaman qosılsa,
Bir el-atqa sıymaydı,
A'depli bolın' kelinshek,
U'lken bolsın tu'yinin',
Qızıq bolsın jıyının'.

Bet ashardın' na'siyat beretug'ın qatarları burınnan xalıq arasında bar so'zler. Na'siyat qatarları ha'r qıylı bolıp keledi. Geyparaları yumor-satirag'a tolı, u'lken ku'lkige alıp keledi. Bet asharda ag'ayın tuwg'anları menen tanıstırg'anda da'slep atası(a'kesi), onnan keyin anası menen tanıstıradı. Burınları olardın' tek jaqsı ta'replerin aytıp, usı xojalıqtın' tirewi, uyıtqısı ekenligin aytıp o'tken. Al ha'zirgi zamanımızda olardın' ka'sibinde qosıp aytıw u'rdiske aynalg'an.

Bet ashar teren' realistlik, turmıs penen bekkem baylanısqan do'retiliwi ha'm atqarılıwı jag'ınan folklorlıq do'retpe bolıp esaplanadı. Onda o'mir shınlıg'ı, ha'r bir adamnın' minez qulqı, is ha'reketine baylanıslı sıpatlar qısqa ha'm a'dil beriledi. Jıynalg'an xalıqqa bet ashardın' ta'sir ku'shinin' o'tkirligi de sonda. Bet ashardın' ha'r bir juwmag'ı qısqa bolsa da sol na'zerde tutılg'an adamg'a ko'rkem obraz jasaladı.

Xalıq uzaq da'wirler dawamında folklordın' ku'shi menen o'z a'wladın u'lken adamgershilikke, doslıqqa, sabırlıqqa, miynet su'ygishlikke h.t.b. adamzattın' en' jaqsı qa'siyetlerine ta'rbiyalang'an.