Batıs Evropa mámleketleri

Batıs Evropa mámleketleri. Evropanıń bul subregionına kontinenttegi eń úlken ekonomikalıq kórsetkishlerge iye úsh mámleket — Germaniya, Franciya hám Ullı Britaniya, sonday-aq, Avstriya, Shveycariya, Belgiya, Niderlandiya, Irlandiya hám de «kishi» mámleketler — Lixtenshteyn, Lyuksemburg hám Monako sıyaqlı eller kiredi. Alp tawlarında jaylasqan Avstriya, Shveycariya hám Lixtenshteyn Alp elleri toparın quraydı. Belgiya, Niderlandiya hám Lyuksemburg mámleketlerine bolsa olar ortasındaǵı ekonomikalıq integraciya procesleri joqarı dárejede ekenligin esapqa alǵan halda «Beniluks» ulıwma ataması qollanıladı. Subregion elleriniń klimat sharayatı ortasha, Franciyanıń qublasında bolsa subtropikalıq klimat qáliplesken. Paydalı qazılmalardan Arqa teńiz akvatoriyasındaǵı neft-gaz (Niderlandiya, Ullı Britaniya), qońır hám taskómir (Germaniya, Franciya, Belgiya, Ullı Britaniya), temir rudaları (Franciya, Germaniya, Lyuksemburg, Belgiya) hám kaliy duzları (Germaniya) kánleri itibarǵa ılayıq. Alp elleri gidroenergiya resurslarına bay. Batıs Evropa ellerinde tuwılıw hám tábiyiy kóbeyiw kórsetkishleri júdá tómen, Germaniyada bolsa kóp jıllardan berli depopulyaciya procesi júz bermekte. Lekin sırtqı migraciya balansı joqarı oń kórsetkishlerge iye bolǵanlıǵı sebepli, subregion mámleketlerinde xalıqtıń kóbeyiwi dawam etpekte. Batıs Evropa kontinent subregionları ishinde eń xalqı tıǵız jaylasqan aymaq bolıp esaplanadı. Urbanizaciya kórsetkishleri, Lixtenshteynnen tısqarı, barlıq mámleketlerde joqarı bolıp, Ullı Britaniya, Belgiya, Niderlandiya, Lyuksemburgta 90% ten joqarı, Monakoda bolsa 100% ke teń.