Asan Begimov

Begimov Asan(1907-1958) – shayır hám jazıwshı.

Tuwılǵan sánesi	1907
Qaytıs bolǵan sánesi	1958

Ómiri hám miynet jolı

1907-jılı Moynaq rayonı aymaǵında tuwılǵan. Ol 1924-jıldan baslap Qońırattaǵı balalar úyinde tárbiyalanǵan. A.Begimov 1927-1932-jılları Alma-atadaǵı pedagogikalıq institutta oqıydı. 1932-1934-jıllar aralıǵında Qaraqalpaqstan Jazıwshılarınıń shólkemlestiriw byurosınıń baslıǵı, al 1934-jılı Jazıwshılar awqamın basqardı. 1936-1937-jılları Tashkenttegi partiya institutında oqıdı. 1938-1939-jılları taǵı da respublikada Jazıwshılar awqamınıń baslıǵı lawazımında isledi. A.Begimov birqansha jıllar dawamında mámleketlik teatrdıń direktorı, radioesittiriw komitetiniń baslıǵı, poligrafiya baspasınıń direktorı, Ózbekstan telegraf Agentliginiń Qaraqalpaqstan bóliminiń baslıǵı, “Qaraqalpaqstan” baspasında bólim baslıq, Jazıwshılar awqamında ádebiy másláhátshi lawazımında isledi. A.Begimov 1934-jıldan Jazıwshılar awqamınıń aǵzası.

Dóretiwshiligi

A.Begimovtıń dáslepki qosıqları 20-jıllardıń ortalarında jarıq kórdi. Ol “Jeńisten – jeńiske” (1935), “Súyińiz” (1949), “Tuwǵan jer” (1955), “Sápura” (1956), “Tańlamalı shıǵarmaları” (1957), “Jańarǵan úlke” (1960) sıyaqlı toplamlardıń avtorı. A.Begimovtıń “Xorlıqtan azat” (1929), “Bul kim” (1932), “Ǵarip-ashıq” (1949-1955) pyesaları mámleketlik teatr saxnasında qoyılǵan. Prozanıń rawajlanıwında A.Begimovtıń “Balıqshınıń qızı” romanı (1958) belgili orın iyeleydi. Bul shıǵarma ózbek hám rus tillerine awdarılǵan (1958-1960). Sonday-aq, Asan Begimov Pushkin, Lermontov, Shevchenko, Gorkiydiń geypara shıǵarmaların qaraqalpaq tiline awdarǵan.

Sıylıqları

A.Begimov “Ózbekstan Respublikasına miyneti sińgen mádeniyat xızmetkeri” ataǵına miyasar boldı (1957). Ol “Húrmet belgisi” ordeni hám medalları menen, Ózbekstan hám Qaraqalpaqstan Respublikası Joqarǵı Keńesiniń Húrmet jarlıqları menen sıylıqlanǵan..

Ádebiyatlar

• Қарақалпақстан Республикасы жазыўшылары ( библиографиялық мағлыўмат ) / нашрга тайёрловчи 3. Бекбергенова -T .: Extremum press , 2011. -240 бет .