Aq terek

Aq terek — egislikte burınnan málim aǵash. Kelip shıǵıwı Gimalay, Awǵanstan bolıwı múmkin. Orta Aziyada, Oraylıq hám Qubla Evropada, Jaqın Shıǵısta erte waqıtlardan beri egilip kelmekte. Aq terek 30-40 metr biyiklikke shekemgi dúziw ósetuǵın, sulıw, piramidalı, turaqlı aǵash. Baǵanasınıń túp jaǵı qaraltım sur reńde, azlap jarılǵan bolıp keledi. Joqarısı tegis, surlaw-jasıl yamasa kúl reńde boladı. Búrtikleri túksiz, ótkir ushlı, qońır túste boladı. Japıraqları úsh múyeshli yamasa rombı sıyaqlı, túksiz, ústki tárepi jasıl, tómengi tárepi aqshıl reńde. Kók terekten sál keyinlew gúlleydi. Aq terek tez ósedi. 10-11 jılda ortasha biyikligi 13-14 metr, ortasha diametri 12-17 santimetr boladı. Biziń jaǵdayda suwıqqa shıdamlı.