Ǵaniy Amaniyazov

Kompozitor Ǵaniy Amaniyazov Qaraqalpaqstanǵa xızmet kórsetken kórkem-óner ǵayratkeri. Ózbekstan xalıq bilimlendiriw aǵlası. «Miynette ayrıqshalıǵı», «Miynet veteranı» ordenleriniń iyesi,respublikaǵa belgili kompozitor. Ol 1940-jılı Kegeyli rayonınıń burınǵı Engels házirgi Qaniyaz Habibullaev atındaǵı kolxozdıń «Bes quy» degen awılında etikshi shańaraǵında tuwıladı. Ǵ.Amaniyazov awıllıq mektepte oqıp júrgende toy merekelerde baqsı jırawlardıń atqarǵan xalıq qosıqların,sazların úzliksiz tıńlawı,onı keleshekte belgili kompozitor bolıp jetilisiwine úlken tásir jasaydı. Ǵ.Amaniyazovtıń dóretpesi keń quramalı bolıp xalqımızǵa 300 den aslam hár túrli janrda jawıngerlik temadan baslap, balalar hám jas óspirimlerge arnalǵan qosıqlar,aytıslar,romanslar,oyın namaları,fortepiano hám basqa da saz ásbapları ushın pyesalar,tarlı kvartet xalıq sazları, orkestr ushın namalar jazıw menen birge,dramaturg Q.Dosanovtıń «Aral hawazı» spektakline A.Sultanov penen birge,sonday-aq xalıq teatrları ushın saxnalıq namalar jazǵan. Ǵ.Amaniyazovtıń balalarǵa hám jas óspirimlerge arnap : «Mektebim»,»Gúbelek»,»Kel oynayıq»,»Kúttik seni asıǵıp»,»Biz baqshada ósemiz»,»Balalıqtıń gúlleri»,»Tınıshlıqtı súyemiz» hám taǵı basqa jazǵan namaları oqıwshılardıń kúndelikli súyip aytılatuǵın qosıqlarına aylanıp ketken. Ǵ.Amaniyazov mektepler ushın «muzika» sabaqlıqların jazıp baspadan shıǵardı.