Ózbekstan Qaharmanı
Ózbekstan Qaharmanı (ózbekshe Ўзбекистон қаҳрамони, Oʻzbekiston qahramoni) — Ózbekstannıń joqarı dárejedegi ataǵı. 1994-jıl 5-mayda shólkemlestirilgen. „Ózbekstan Qaharmanı“ ataǵın hám “Altın juldız” medalın shólkemlestiriw haqqındaǵı nızam Ózbekstan Respublikası Joqarı sudınıń 1994-jıl 5-maydaǵı 1039-XII-san sheshimi menen kúshke kirgen[1], Ózbekstan Respublikasınıń 1996-jıl 30-avgusttaǵı (278-I-san) hám Ózbekstan Respublikasınıń 2004-jıl 3-dekabrdegi (714-II-san) Nızamına muwapıq ózgerisler kiritilgen.
Ózbekstan Respublikasınıń puqaralarına mámleket hám xalıq aldındaǵı qaharmanlıq, mártlik kórsetkenligi ushın beriledi. Ataq ayırım jaǵdaylarda Ózbekstan Respublikası puqarası bolmaǵan shaxslarǵa da beriliwi múmkin. „Ózbekstan Qaharmanı“ Ózbekstan Respublikasınıń Prezidenti tárepinen beriledi. Ataqtı beriw Ózbekstan Respublikası Ministrler Keńesi, Ózbekstan Respublikası Konstituciyalıq sudınıń baslıǵı, Ózbekstan Respublikası Joqarı sudınıń baslıǵı, Ózbekstan Respublikası Joqarı xojalıq sudınıń baslıǵı, Ózbekstan Respublikası Bas prokurorı, Qaraqalpaqstan Respublikası Joqarı Keńesiniń baslıǵı, Wálayatlar hám Tashkent qalası hákimlikleri, ministrlikler, mámleket komitetleri hám keńseler basshılarınıń hám de jámiyetlik birlespeleri respublika shólkemleriniń usınısına qaray ámelge asırıladı. „Ózbekstan Qaharmanı“ ataǵı menen sıylıqlanǵan shaxsqa joqarı nıshan — „Altın juldız“ medalı hám ataq berilgenligi haqqındaǵı hújjet tapsırıladı. „Ózbekstan Qaharmani“ ataǵı menen sıylıqlanǵan shaxslar aylıq mıynet haqına yamasa pensiyasına qosımsha túrde eń kem aylıq mıynet haqı muǵdarında ay sayın tólenetuǵın ústeme sıylıq aladı, nızam hújjetlerinde belgilep qoyılǵan jeńilliklerden paydalanadı. „Altın juldız“ medalı 750 dárejeli (probali) altın eritpesinen tayarlanıp, aldıńǵı tárepinde hár bir qırınıń eki qaptalınan altın nurlar taralǵan segiz qırlı juldız formasında boladı, salmaǵı 12, 5 f. „Altın juldız“ medalı kókirektiń shep tárepine orden hám medallardan joqarılawıa taǵıladı. „Ózbekstan Qaharmanı“ tek bir márte beriledi. „Ózbekstan Qaharmanı“ ataǵı qaytıs bolǵanınan keyin berilgen jaǵdayda „Altın juldız“ medalı hám ataq berilgenligi haqqındaǵı hújjet sıylıqlanǵannıń shańaraǵına tapsırıladı.